Virðingarleysi hjá Wenger

Ray Wilkins, þjálfari hjá Chelsea, segir það virðingarleysi hjá Arsene Wenger að tefla fram unglingum sínum í enska deildarbikarnum.

Wilkins segir ekki koma til greina að Chelsea geri slíkt hið sama og segir það gera lítið úr keppninni. Chelsea mun tefla fram sterku liði gegn Jóhannesi Karli Guðjónssyni og félögum í Burnley í kvöld.

"Stórir klúbbar vilja fyrst og fremst vinna titla. Sú staðreynd að við höfum unnið þennan bikar tveisvar á síðustu fjórum árum en Arsenal aldrei, staðfestir að stefna okkar er betri. Menn taka þátt í keppnum til að vinna þær. Til hvers að taka þátt ef þér er alveg sama hvort þú vinnur? Það að tefla fram ungu eða veikara liði dregur úr vægi keppninnar og það munum við ekki gera. Við viljum vinna hana," sagði Wilkins í samtali við Sun.