Bond leitar hefnda í nýju myndinni

Nýjasta myndin um spæjarann kynþokkafulla, James Bond, mun bera nafnið Quantum of Solace. Nafnið og söguþráðurinn var kynntur við hátíðlega athöfn í Pinewood kvikmyndaverinu í dag.

Daniel Craig mun leika Martinisvelginn í annað sinn. Sér til halds og traust í Quantum of Solace hefur hann nýstirnið Gemmu Atkinson og úkraínsku fyrirsætuna og leikkonuna Olgu Kurylenko.

Að sögn framleiðenda myndarinnar hefur Craig lýst yfir áhuga á að gera fleiri Bond myndir. Ljósa hárið sem var talið honum til vansa í fyrstu myndinni, Casino Royal, virðist því ekki hafa skemmt mikið fyrir honum. Hann hlaut einróma lof gagnrýnenda og aðdáun kvenna um heim allan fyrir frammistöðu sína í Casino Royal.

Í Quantum of Solace fer Bond í hefndarför sem leiðir hann til Austurríkis, Ítalíu og Suður-Ameríku. Söguþráðurinn er í beinu framhaldi af Casino Royal, þar sem Bond leitar sannleikans um hina íðilfögru Vesper, sem sveik hann. Camille, persóna Olgu Kurylenko leikur útsendara hins illa Dominic Greene , sem leitast við að ná völdum yfir gríðarlegum náttúruauðlindum. Bond kemst að því að samtök Greene hafa reynt að kúga fé út úr Vesper. Þó þau eigi sér ólík markmið þurfa þau á endanum að læra að vinna saman.