Íbúð Heath leit „eðlilega“ út

Bráðaliðar sem komu fyrstir að heimili Heath Ledger í gær sögðu við yfirheyrslur hjá lögreglu að ekkert í íbúðinni hefði bent til eiturlyfjanotkunar. Upprúllaður 20 dollara seðill fannst á heimilinu, en við prófanir á honum fundust engin ólögleg efni. Þá sögðu bráðaliðarnir að lyfjaglösin sem fundust hefðu flest verið næstum full.

Heimildamenn TMZ innan lögreglunnar í New York sögðu að meðal þeirra lyfja sem fundust hafi verið kvíðastillandi lyfin Xanax, Valium og Atvian, svefnlyfið Lunesta og róandi lyfið Restoril sem er notað af fólki sem á í miklum erfiðleikum með svefn.

Ekkert kom fram við krufningu Ledgers sem gat útskýrt dánarorsök. Niðurstöðu er nú beðið úr eiturefnagreiningu, sem getur varpað ljósi á hvað dró hann til dauða.