Rétt framkvæmd samninga geti leitt til lækkunar vaxta og verðbólgu

Samtök atvinnulífsins segja mikilvægt að fyrirtæki geri ekki aðrar launabreytingar nú en þær sem ákveðnar eru í samningum sem skrifað var undir í kvöld. Segja samtökin að með réttri framkvæmd kjarasamninga og framlagi stjórnvalda séu góðar horfur á að starfskilyrði atvinnulífsins batni, vextir lækki og verðbólga minnki og raunverulegar kjarabætur verði tryggðar.

Fram kemur í tilkynningu frá SA vegna hinna nýju samninga að kauptaxtar verkafólks hækki um 18 þúsund krónur á mánuði og iðnaðarmanna um 21 þúsund. Samningarnir fela í sér launaþróunartryggingu sem er 5,5 prósent sem virkar þannig að hafi laun ekki hækkað sem því nemur frá 2. janúar 2007 hækka þau nú um það sem á vantar hjá þeim sem hafa verið í starfi þennan tíma. Laun sem hafa hækkað um 5,5 prósent eða meira hækka ekki nú. Í samningunum felist því engar almennar flatar launahækkanir.

,,Meginatriði þessara samninga er að forgangsraða því svigrúmi sem atvinnulífið hefur til launahækkana til þeirra sem greidd eru laun samkvæmt lægstu kauptöxtum og til þeirra sem setið hafa eftir í launaskriði. Með samningunum skapast raunhæfur möguleiki á að ná niður verðbólgu og að launa- og verðbreytingar verði almennt í sama farvegi og í nágrannalöndum okkar," segja Samtök atvinnulífsins.

Samtökin benda á að launakostnaður fyrirtækja aukist mismikið með hinum nýju kjarasamningum. Breytingarnar séu allt frá því að verða litlar sem engar í að mælast í drjúgum hækkunum þegar allra lægstu hugsanlegu laun eru skoðuð. Forgangsröðunin skapi grunn að nýju jafnvægi á vinnumarkaðnum og í atvinnulífinu sem sé forsenda stöðugleika og hjöðnun verðbólgunnar.

Þá segja samtökin að hækkanir samkvæmt kjarasamningum séu mjög sambærilegar við niðurstöður samninga 22. júní 2006. ,,Verðbólgan á síðari hluta árs 2006 lækkaði mjög í kjölfar þeirra samninga og á síðari árshelmingi var hraði verðbólgunnar kominn niður fyrir 3%. Verðbólgan fór svo vaxandi á nýjan leik þegar kom fram á árið 2007 fyrst og fremst vegna hækkunar íbúðaverðs. Engin ástæða er til annars en álykta að verðbólguhjöðnun í framhaldi af samningunum núna verði svipuð og á síðari hluta árs 2006.," segir í tilkynningu SA.