Fundur ríkisstjórnarinnar og fulltrúa atvinnulífsins hafinn

Formenn stjórnarflokkanna funda nú með forystumönnum Alþýðusambandsins og Samtaka atvinnulífsins í stjórnarráðinu til að kynna fyrir þeim aðgerðir sem ríkisstjórnin er tilbúin að grípa til í tengslum við nýja kjarasamninga.

Í Silfri Egils í dag sagði Geir H Haarde að persónuafsláttur verði hækkaður meira en áður var gert ráð fyrir og barna- og vaxtabætur hækkuðu einnig. Forsætisráðherra sagði jafnframt að tekjuskattur fyrirtækja yrði lækkaður úr 18 prósentum í fimmtán. Hann sagðist telja að þetta myndi ekki leiða til tekjulækkunar hjá ríkissjóði.

Ríkisstjórnin mun afhenda aðilum vinnumarkaðrins yfirlýsingu sína seinna í dag, en um er að ræða einhliða yfirlýsingu að hálfu ríkisstjórnarinnar, þannig að um innihald hennar verður ekki samið. Geir sagði stjórnvöld hins vegar hafa átt gott samstarf við bæði forystu ASÍ og Samtaka atvinnulífsins, sem eins og stjórnvöld vildu með samningum sínum stuðla að stöðugleika í íslenskum efnahagsmálum, lækkun vaxta og verðbólgu og koma í veg fyrir atvinnuleysi.

Forsætisráðherra segist reikna með að vextir byrji að lækka á næstunni. Ef forystumenn ASÍ og Samtaka atvinnulífsins telja yfirlýsingu stjórnvalda nægja miðað við þær kröfur sem samtökin hafa sett fram á stjórnvöld, verður skrifað undir nýja kjarasamninga seinnipartinn í dag eða í kvöld.