Lumar þú á heimildamynd?

Heimildamyndahátíðin Skjaldborg verður haldin í annað sinn Hvítasunnuhelgina níunda til tólfta maí í einu fallegasta og minnst þekkta kvikmyndahúsi Íslands; Skjaldborgarbíói á Patreksfirði.

Auk þess að frumsýna nýjar íslenskar heimildamyndir, er hátíðinni ætlað að vera vettvangur fyrir kvikmyndagerðarfólk og áhugamenn um heimildamyndir til að hittast og skiptast á skoðunum. Í fyrra kepptu átján myndir um verðlaun hátíðarinnar, „Einarinn" og varð Sófakynslóðin eftir Áslaugu Einarsdóttur og Garðar Stefánsson þeirra hlutskörpust.

Til að koma mynd inn á Skjaldborg þarf hún þó að uppfylla hinar þrjár heilögu reglur hátíðarinnar: 1) Myndin verður (með einhverjum hætti) að geta talist íslensk. 2) Hún má ekki vera (svo) leikin. 3) Myndin má (helst) ekki hafa kostað meira en 350 milljónir. Eru allir þeir sem eiga heimildamynd sem enn hefur ekki fengist sýnd hvattir til að senda inn eintak á info@skjaldborgfilmfest.com.