Síðasta sýningarhelgi og ljósmyndaraspjall

Nú stendur yfir síðasta sýningarhelgi sýningarinnar Undrabörn sem vakið hefur mikla athygli síðan hún var opnuð í Þjóðminjasafninu í september síðastliðnum. Á sýningunni má sjá ljósmyndir Mary Ellen Mark og Ívars Brynjólfssonar og kvikmyndina Alexander eftir Martin Bell sem er sýnd í fyrirlestrasalnum á hverjum degi, þrisvar á dag. Í tilefni sýningarloka verður ljósmyndarinn Ívar á staðnum í dag kl. 15 og segir sýningargestum frá ljósmyndum sínum.

Ljósmyndir hins heimsþekkta bandaríska ljósmyndara Mary Ellen Mark af fötluðum börnum á Íslandi, nemendum Öskjuhlíðarskóla, Safamýrarskóla og Lyngáss eru burðarás sýningarinnar. Myndir hennar sýna á áhrifaríkan hátt veruleika þessara barna í samtímanum, enda er hún þekkt fyrir næman og kraftmikinn ljósmyndastíl sinn.

Þátttaka Ívars í sýningunni er þannig til komin að hann hefur áður getið sér gott orð fyrir ljósmyndir sínar þar sem hann beinir sjónum sínum að umhverfi og mannvirkjum á formrænan hátt. Mary Ellen Mark heillaðist mjög af ljósmyndum hans eftir að hafa séð þær í bókinni Specimina Commercii sem kom úr árið 2006 og lagði hún því til að hann tæki myndir af skólaumhverfi barnanna sem sýndar yrðu sérstaklega með ljósmyndum hennar á sýningunni Undrabörn.

Ívar reynir að lýsa umhverfinu og því sem hann sér innan skólanna á sem skýrastan hátt. Gegnum myndir hans verður starfsemin sem fram fer í rýminu sýnileg án þess þó að fólkið sjálft sé sýnt. Nálgun Ívars er þannig gjörólík nálgun Mary Ellen Mark sem horfir einmitt á fólkið. Það er því fróðlegt fyrir áhugafólk um ljósmyndun að fá í dag tækifæri til að heyra frá Ívari sjálfum hvernig hann nálgaðist þetta verkefni.