Í þriðja sinn á forsíðu Playboy

Skutlurnar Holly Madison, Bridget Marquardt og Kendra Wilkinson, kærustur Playboy-kóngsins Hughs Hefner, birtast í þriðja sinn á forsíðu tímaritsins á næstunni.

„Þetta var ekki upphaflega hugmyndin enda vissi ég að þær hefðu birst áður á forsíðunni. Fyrir árslista okkar yfir 25 kynþokkafyllstu stjörnurnar fáum við alltaf atkvæði frá lesendum okkar á netinu og eftir því sem tíminn leið stigu stelpurnar hærra og hærra upp listann,“ sagði Hefner.

Stúlkurnar, sem eru stjörnur raunveruleikaþáttarins The Girls Next Door á sjónvarpsstöðinni E!, lentu í fjórða sæti á listanum. Í efstu þremur sætunum voru Angelina Jolie, Scarlett Johansson og Jessica Alba. Á meðal fleiri stjarna sem fengu atkvæði voru Jennifer Love Hewitt, Alicia Keys, Cameron Diaz, Beyonce, Christina Aguilera og Britney Spears.

„Ef ég á að vera hreinskilinn þá varð ég óvænt ástfanginn,“ sagði Hefner um samband sitt við kærusturnar þrjár. „Sambandið við Holly á örugglega eftir að endast að eilífu. Hinar endast í þessu eins lengi og þær vilja þangað til þær hefja sinn eigin feril og sitt eigið líf.“

Sex ár eru liðin síðan Hefner, sem verður 82 ára í apríl, og hin 29 ára Holly byrjuðu saman. Þykir það langur tími þegar kemur að ástamálum Playboy-kóngsins mikla.