Njörðurinn hitti hnakkann

Hinir mjög svo ólíku rithöfundar og frammámenn Gils N. Eggerz og Gilzenegger hittust í fyrsta sinn í dag á heimavelli þess síðarnefnda, H10-gyminu í Kópavogi.

Þar færði sá fyrrnefndi hinum síðarnefnda fyrsta kassann af nýju upplagi bókar sinnar, Biblíu gáfaða fólksins, ásamt fleiri greindarlegum bókum eins og það er orðað í tilkynningu. Þá vildi herra Eggerz endilega að Gillzenegger gæfi félögum sínum Biblíu gáfaða fólksins, og taldi brýna þörf á. Þess má geta að Gilzenegger gaf út bók í hitteðfyrra sem bar svipað nafn, Bilbía fallega fólksins.

Þeir tókust í hendur og Gils N. Eggerz fyrirgaf Gillzenegger nafnastuldinn þrátt fyrir að þessi ruglingur hefði kostað hann nokkur vandræði enda voru þeir sammála um að nafnið er þrælgott. Þá bendir Gilz N. Eggerz á að nafni hans hafi haft rangt fyrir sér um að hann væri 30 kílóa ljóðahommi. Gils N. Eggerz sé nefnilega talsvert hávaxnari og spengilegri en Gillzenegger sjálfur!

Fyrir þá forvitnu heitir Gils N. Eggerz réttu nafni Bragi Páll Sigurðsson en hnakkinn, nafni hans, heitir Egill Einarsson.