Jóhanna Guðrún springur út í haust

Fyrir átta árum skaut Jóhönnu Guðrúnu Jónsdóttur upp á stjörnuhimininn, aðeins níu ára að aldri. Söngkonan unga var alls staðar í rúm þrjú ár, gaf út þrjár plötur á Íslandi en eins og hendi væri veifað var eins og jörðin hefði gleypt hana.

Lítið hefur spurst til Jóhönnu Guðrúnar Jónsdóttur síðustu árin. Á bak við tjöldin hefur Jóhanna Guðrún ásamt lærimeistara sínum, Maríu Björk Sverrisdóttur, unnið hörðum höndum að því að finna „rétta stílinn og rétta tóninn" eins og María Björk kemst sjálf að orði þegar Fréttablaðið náði tali af henni. Reiknað er með að afraksturinn líti dagsins ljós fyrir áramót hér á landi en nú sé bara verið að leita að framleiðanda fyrir síðustu metrana til að setja punktinn yfir i-ið.

Meðal þeirra sem koma við sögu á væntanlegri plötu söngkonunnar er Diane Warren, lagahöfundurinn þaulreyndi, en hún hefur samið lög fyrir tónlistarmenn á borð við Aerosmith, Michael Bolton og Jessicu Simpson. Til stendur að Jóhanna Guðrún fari smám saman að láta meira á sér bera á næstunni í íslensku tónlistarlífi og samkvæmt heimildum Fréttablaðsins gætu landsmenn átt von á því að sjá Jóhönnu Guðrúnu á Airwaves. Hátíð sem oftar en ekki hefur reynst íslenskum tónlistarmönnum happadrjúgur stökkpallur.

Þær eru ófáar kjaftasögurnar sem hafa verið í gangi í kringum Jóhönnu Guðrúnu, heimsfrægðin hefur verið sögð á næsta leiti og svona mætti lengi telja. „Fólk heldur oft að svona hlutir gerist bara á einni nóttu en að baki svona verkefni liggur mikil vinna. Róm var ekki byggð á einum degi," segir María. „Svo er þetta líka allt spurning um réttu tímasetninguna."

Stóru útgáfufyrirtækin Universal og Sony auk annarra stórra útgáfufyrirtækja bíða spennt eftir því að sjá hvernig útkoman verður enda hafa þau fylgst grannt með gangi mála hjá Jóhönnu. María Björk segir enn ekki ákveðið hvort herjað verði á Bandaríkjamarkað eða Bretland þegar þar að kemur en telur líklegra að Ameríka verði fyrir valinu. „Þar er enda fimmtíu prósent af öllum markaðinum og það er oft erfitt að fara frá Bretlandi yfir til Bandaríkjanna," útskýrir María. Hún segir ástæðuna fyrir því að svona langur tími hafi liðið sé fyrst og fremst ungur aldur Jóhönnu. „Við vildum bíða þar til að hún væri orðin sautján ára og að hún væri búin að fullmóta sinn stíl áður en stóru laxarnir næðu að krækja í hana. Því eftir það ráða þeir öllu," segir María sem hefur staðið þétt við bakið á Jóhönnu í gegnum þessi fimm ár.

Að sögn Maríu hafa árin verið mikil þolinmæðisvinna, bæði erfið og lærdómsrík en nú sé verið að hleypa þessu mikla ævintýri loks af stokkunum. Fjölmiðlar hafi sýnt þessu mikinn áhuga en þau hafi kosið að halda Jóhönnu sem mest fyrir utan kastljósið. „Nú fer þetta hins vegar allt að bresta á," segir María.