Mannréttindardómstóllinn dæmir íslenska ríkið skaðabótaskylt

Mannréttindardómstóll Evrópu hefur úrskurðað að íslenska ríkið sé skaðabótaskylt gagnvart níu ára gamalli stúlku vegna læknamistaka. Alls er ríkinu gert að greiða stúlkunni 6,4 milljónir króna í bætur auk 1,5 milljón króna í málskostnað. Héraðsdómur Reykjavíkur dæmdi stúlkunni 28,5 milljónir króna í bætur árið 2002 en Hæstiréttur sýknaði ríkið af kröfunni tveimur árum seinna. Samkvæmt úrskurði Mannréttindardómstólsins fékk stúlkan ekki réttláta málsmeðferð fyrir Hæstarétti.

Stúlkan fæddist á kvennadeild Landspítalans í marsmánuði árið 1998. Fæðingunni var lokið með bráðakeisaraskurði en við skoðun kom í ljós íferð í lunga og var stúlkan því sett í hitakassa, gefið súrefni og sett á sýklalyf. Þræddir voru æðaleggir í naflabláæð og naflaslagæð til að fylgjast með sýrustigi, súrefnisinnihaldi og koltvísýringsinnihaldi.

Stúlkan varð fyrir töluverðum heilaskemmdum í meðferðinni og hefur verið metin 100 prósent öryrki síðan. Talið var að lega slagæðaleggsins hafi valdið heilaskemmd.

Héraðsdómur Reykjavíkur dæmdi stúlkunni í vil í apríl árið 2002 og gerði ríkinu skylt að greiða henni 28,5 milljónir króna í skaðabætur vegna læknamistaka. Hæstiréttur sneri dómi héraðsdóms hins vegar við og sýknaði ríkið.

Í dómi Mannréttindardómstóls Evrópu þykir það gagnrýnisvert að Hæstiréttur hafi leitað umsóknar hjá læknaráði varðandi málið. Í læknaráði sitja meðal annars læknar frá Landspítalanum og því þykir stúlkan hafa verið svipt rétti sínum á réttlátri málsmeðferð.

Í fréttum Ríkisútvarpsins var eftir Heimi Erni Herbertssyni, lögmanni stúlkunnar, að hann muni í kjölfar dóms Mannréttindardómstólsins höfða skaðabótamál á hendur ríkinu.