Britney á hóteli með paparassa

Britney Spears hefur tekið upp nýjar og óvæntar aðferðir til að kljást við paparassana sem fylgja henni í hvert fótmál. Aðfaranótt sunnudags var Britney á ferð með paparassahernum sínum, þegar hún ákvað skyndilega að hoppa upp í bíl hjá einum þeirra, Adnan Ghalib.

Þau keyrðu um með halarófuna af paparössum í eftirdragi og stoppuðu á nokkrum bensínstöðvum og í apóteki, áður en þau enduðu á fimm stjörnu hóteli. Þar dvöldu hún og myndatökumaðurinn, hinn harðgifti Adnan Ghalib, í nokkrar klukkustundir bak við luktar dyr.

Britney kynntist Adnan fyrir nokkrum mánuðum, þegar hann byrjaði að fylgja henni eftir. Hún veitti honum viðtöl, sem hún gerði ekki við hina paparassana, og hann hjálpaði henni í staðinn. Náði í Starbucks kaffi eða dældi fyrir hana bensíni þegar hún átti erfitt um vik að hreyfa sig vegna ágengni ljósmyndara.

Vinur Adnans sagði við Page Six að ekkert ósiðlegt hefði átt sér stað á hótelherberginu. Britney hefði einfaldlega þurft að tala, og það heilmikið.