Síðasta 90s partýið á gamlárskvöld

DJ Kiki-Ow og DJ Curver halda á gamlárskvöld sitt síðasta 90s Partí á Nasa. Skötuhjúin hafa undanfarin tvö ár tryllt lýðinn með NO LIMITS-kvöldum sínum, þar sem fólk hefur veifað ,,glowsticks" og dansað sig sveitt við ljúfa tóna tíunda áratugarins.

Curver er nýfluttur til Bandaríkjanna og því verður partí hans og Kiki-Ow á gamlárskvöld hið síðasta í bili. Segir í tilkynningu frá þeim að þau séu harðákveðin að greypa það í minni gesta sem eitt stærsta áramótapartí sem landinn hefur séð.

Auk 90s tónlistar og gámafylli af glowsticks verður andlitsmálari á staðnum sem skreytir gesti með útfjólublárri og glimmermálningu.

Þá mætir tískulöggan alræmda, Yvan Rodic, í partíið. Smekklegir gestir geta því átt von á því að sjá sig einni þekktustu tískubloggsíðu heims, facehunter.blogspot.com, en um 20.000 manns skoða hana á degi hverjum. Rodic myndar meðal annars fyrir tímaritin Elle og GQ. Hann hefur áður tekið myndir af fólki á Airwaves hátíðinni og birt af því myndir á heimasíðu sinni.

Partíið hefst klukkan eitt eftir miðnætti. Miðar kosta 3500 krónur, og eru seldir á midi.is og í Spúútnik á Laugavegi, en þeir sem kaupa miða þar fá einnig 20% afslátt af 90s fötum.