Stútur kitlaði pinnann

Lögreglan á höfuðborgarsvæðinu stöðvaði tvo ökumenn í gær vegna gruns um ölvunarakstur. Annar þeirra var stöðvaður á Kringlumýrarbraut en bíll hans mældist á 139 km hraða. Ökumaðurinn, sem er fimmtugur, rengdi ekki hraðamælinguna en bar því við að hann vissi ekki hver leyfður hámarkshraði á þessum stað væri.

Tuttugu og átta umferðaróhöpp voru tilkynnt til lögreglu í gær. Einn var tekinn fyrir að aka próflaus á bifhjóli. Það var 16 ára piltur sem var á ferðinni í Hafnarfirði um miðjan dag. Þá hafði lögreglan afskipti af hálfþrítugri konu sem lagði bíl sínum í stæði rétt hjá lögreglustöðinni við Hlemm. Bíllinn var búinn nagladekkjum og var óskoðaður.