Uppselt á tónleika til styrktar krabbameinssjúkum börnum

Uppselt er á tónleika sem Popp-landslið Íslands stendur fyrir í Háskólabíó í dag. „Þetta er fyrir löngu orðin fastur viðburður í dagatalinu hjá okkur og ég er bæði hrærður og þakklátur yfir þessum frábæru viðtökum. Þetta er auðvitað fyrst og síðast þessum frábæru listamönnum að þakka. Örlæti þeirra og velvild við Styrktarfélag krabbameinssjúkra barna er ótrúleg og við erum þeim óendanlega þakklát," sagði Einar Bárðarson skipuleggjandi tónleikanna.

Í tilkynningu frá aðstandendum tónleikanna kemur fram að allir þeir sem komi að tónleikunum gefi vinnu sína, listamenn, tæknimenn og aðrir starfsmenn. Þá hafa afnot af Háskólabíói verið endurgjaldslaus. Bylgjan, Stöð2, EB Kerfi og Concert hafa styrkt tónleikana frá því að þeir voru fyrst haldnir fyrir níu árum síðan.

Árlega greinast að meðaltali 10 - 12 börn og unglingar 18 ára og yngri með krabbamein á Íslandi. Markmið með stofnun Styrktarfélags krabbameinssjúkra barna var meðal annars að styðja við bakið á þeim og aðstandendum þeirra bæði fjárhagslega og félagslega. Í upphafi hafði félagið takmarkað bolmagn til framkvæmda en úr rættist með stórri landssöfnun 1993. Þá var meðal annars stofnaður neyðarsjóður sem meðlimir Styrktarfélags krabbameinssjúkra barna geta sótt um fjárstyrk úr. Fimm manna nefnd metur umsóknir og úthlutar styrkjum en tengist Styrktarfélagi krabbameinssjúkra barna ekki að neinu öðru leyti.