Mest pirrandi manneskja ársins

Lesendur Parade tímaritsins völdu Rosie O´Donnell mest pirrandi manneskju ársins 2007. Rosie hlaut atkvæði 44% þeirra sem kusu en á eftir henni kom Paris Hilton með 24% atkvæða. Frjálshyggjupostulinn Ann Coulter fékk svo 16% og Heather Mills 12%.

Rosie er sögð vera svolítið súr yfir valinu. „Ég er víst mest pirrandi stjarna, samkvæmt vali Parade tímaritsins. Í fullri hreinskilni þá eru flestar stjörnur pirrandi. Ég er því sammála. Stjörnur eru pirrandi og þar sem ég er ein slíkra, hlýt ég að vera pirrandi. Og ég býst við að ég sé mest pirrandi allra," segir Rosie. Hún telur að þetta megi skýra með því hversu hávær hún sé.