Minnisleysi veldur vandræðum við ævisöguritun Ozzy Ozbourne

Ozzy Osbourne á í stökustu vandræðum með að skrifa ævisögu sína, þar sem hann man ekki helminginn af því sem hefur komið fyrir hann.

Rokkarinn skrifaði fyrir tveimur árum undir 60 milljóna króna samning um útgáfurétt á ævisögu sinni, en hefur lítið unnið í henni síðan. Það fer að fjúka í flest skjól, því bókin átti að koma út í maí árið 2008.

Heimildamaður Hollyscoop vefsíðunnar segist hafa miklar efasemdir um að bókin náist fyrir þann tíma, þar sem Ozzy hefði ekki skrifað stafkrók enn. Þá hafi hann ekki einu sinni ráðið rithöfund til að aðstoða sig við verkið. ,,Það verður eitthvað í að þessi bók komi út, ef hún gerir að nokkurn tímann" sagði heimildamaðurinn.

Ozzy segir sjálfur að minni hans hafi farið í vaskinn vegna ótæpilegrar áfengis- og vímuefnaneyslu á árum áður: ,,Ég er oft spurður hvort það sé satt að ég hafi tekið línu af maurum í nefið. Þar sem ég þekki mig finnst mér það alveg möguleiki. En man ég það? Ekki séns."