Íslenskt skítviðri um áramót

Sigurður Þ. Ragnarsson veðurfræðingur er ekki bjartsýnn á gott skotveður um áramótin. ,,Þetta er ekkert veður, þetta er eiginlega bara viðrini." segir Siggi.

Djúp og kröpp lægð verður við vesturströnd landsins á gamlárskvöld og dýpkar eftir því sem líður á kvöldið. Hvassviðri verður um mest allt land, þó síst á norð-austurlandi þar sem vindur verður hvað skaplegastur. Búast má við hvassviðri eða stormi á bilinu 15-23 metrar á sekúndu sunnan og vestanlands, en allhvasst verður norðanlands, 13 - 18 metrar á sekúndu. Samhliða lægðinni vex úrkoma. Hún fellur fyrst sem slydda, en þegar fólk stendur upp frá áramótaskaupinu má búast við að farið verði að rigna. Hiti verður frá 0 - 6 stig.

,,Spáin er ekki góð, svo það þýðir ekkert kæruleysi við meðferð flugelda." segir Siggi, sem segir að miðað við rokið þurfi skotfætur að vera traustir ef ekki eiga að hljótast vandræði af. ,,Gangi spáin eftir verða menn að vanda til verka við flugeldaskot. Vafalaust er ekkert óskynsamlegt að kaupa tertur í stað flugkelda." segir Siggi.

Hann bætir því þó við að spáin eigi eftir að hnoðast til og enn kunni að verða minniháttar breytingar. Meginlínur séu þó skýrar. Aðspurður hvað fólk geti tekið til bragðs segir Siggi að fólk þurfi að fjárfesta í viðeigandi búnaði; rokeldspýtum og vatnsheldum hlífðarbúnaði.