McDonalds í jólamatinn hjá Brangelinu

Fylltir kalkúnar og annað hefðbundið jólagotterí voru ekkert að þvælast fyrir á jólaborði Brads Pitt og Angelinu Jolie þetta árið. Þvert á leiðbeiningar manneldisráðs borðaði fallegasta fólk heims sveittan hamborgara í jólamatinn.

Á jóladag renndi Brad upp að lúgu á McDonalds í New Orleans og fjárfesti í happy meal fyrir börnin öll og fullorðinsmáltíðum fyrir sig og spúsuna. Einhverjir hljóta að gleðjast yfir því að Angelina hafi fengið matarlystina aftur, en hún léttist um hálfa mannsþyngd á árinu í kjölfar óvænts andláts móður sinnar.