Jólaávarp Bretadrottningar sýnt á YouTube í dag

Elísabet bretadrottning vill ná til yngri kynslóðarinnar í Bretlandi og því hefur verið ákveðið að senda jólaávarp hennar til þjóðarinnar á YouTube í dag. Um er að ræða myndband með ávarpinu sem verður flutt á vefsíðunni kl. þrjú.

Fyrir utan þetta geta þeir sem áhuga hafa á bresku konungsfjölskyldunni farið inn á slóðina www.youtube.com/theroyalchannel. Þar er að finna fyrri jólaávörp drottningar, myndasafn af fjölskyldunni og nýlegar upptökur af starfi þeirra.

Útsendingin á vefsíðunni Youtube ber upp á 50 ára afmæli beinna útsendinga BBC af jólaávarpi drottningarinnar. Það mun einkum hafa verið fyrir tilstuðlan prinsessanna Beatrice og Eugenie að Elísabet féllst á að koma fram á Youtube. Báðar prinsessurnar munu vera ákafir notendur vefsíðunnar FaceBook.