Terminator og frú klæðast 66° Norður

Arnold Scwarzenegger ríkisstjóri Kaliforníu og kona hans Maria Shriver fá fatnað frá 66° norður í jólagjöf. Búningahönnuður nokkur í Hollywood, kunningjakona Sigurjóns Sighvatssonar, kvikmyndaframleiðanda og eins eiganda 66° Norður leitaði til hans á dögunum af því erfiðlega gekk að finna dúnúlpu í þeirri stærð sem hana vantaði. Úlpan átti vissulega að vera í stærri kantinum, enda ætluð sem jólagjöf handa Terminatornum sjálfum.

Schwarzenegger er ekki sá eini sem fær íslenskan útivistafatnað í jólagjöf. Á dögunum keyptu forstjóri Universal kvikmyndafyrirtækisins og eiginkona hans jólagjafir handa vinum og vandamönnum í netverslun 66¨° og í fyrra keypti Yoko Uno hundrað Þórsmörk Parka dúnúlpur í jólagjafir. Þá fá allir starfsmenn á vinnustofu Ólafs Elíassonar gjafir frá 66°.

Sigurjón segir að fyrirtækið hafi lítið auglýst, en að hróður varanna hafi borist manna á milli, og hinir ýmsu einstaklingar hafi verið duglegir að kynna vörurnar. ,,Eli Roth og Quentin Tarantino hafa til dæmis verið afar duglegir, án nokkurrar hvatningar að kynna og gefa fötin." segir Sigurjón.