Michael Jackson heldur andlitinu - með Post It miðum

Poppstirnið Michael Jakcson hefur áralanga reynslu af lýtalækningum. Eitthvað virðist þó hafa farið úrskeiðis með andlitið á honum, sé að marka þessa mynd sem náðist af söngvaranum á rölti í bókaverslun í Las Vegas á dögunum. Hinn tæplega fimmtugi konungur poppsins var í verslunarleiðangri með börnum sínum, Prince, tíu ára, Paris, níu ára, og hinum fimm ára Blanket, sem hann veifaði svo eftirminnilega fram af svölum Adlon hótelsins í Berlín árið 2002.

Miklar vangaveltur hafa verið um útlit Jakcsons í gegnum tíðina, en hann er talinn hafa farið í fjölda aðgerða til að minnka nef, hækka kinnbein, lyfta enni og þynna varir auk þess sem húðlitur hans hefur á dularfullan hátt breyst frá brúnum í fölbleikan gegnum árin. Í viðtali hjá Opruh Winfrey árið 1993 sagðist Jackson einungis hafa farið í örfáar aðgerðir. Svo fáar að það væri hægt að telja þær á tveimur fingrum. Andlit hans hefði breyst þegar hann varð kynþroska, og grenntist. Húðlitinn sagði hann afleiðingu af sjúkdómnum Vitiligo. Hann er þá líklega með óvenjulega útgáfu hans. Sjúkdómurinn lýsir sér yfirleitt þannig að litarefni hverfur úr húðinni á afmörkuðum svæðum svo fólk verður flekkótt.