Miðar á styrktartónleika rjúka út

Miðasala á árlega tónleika til styrktar Styrktarfélagi krabbameinssjúkra barna hefur farið með látum af stað og aldrei nokkurn tíma hafa miðarnir selst svona hratt. Aðeins eru örfáir miðar eftir inni á miði.is "Ég tala fyrir hönd allra sem að þessu skipulagi og að þessari framkvæmd koma. Við erðum hrærð og þakklát fyrir þessar frábæru viðtökur. Þetta er auðvitað fyrst og síðast þessum frábæru listamönnum að þakka. Örlæti þeirra og velvild við SKB er ótrúleg og við erum þeim óendanlega þakklát" sagði Einar Bárðarson skipuleggjandi tónleikanna.

Rjómi íslenskra tónlistamanna kemur saman í Háskólabíói sunnudaginn þrítugasta desember á árvissum tónleikum til styrktar krabbameinssjúkra barna. Þetta er í níunda sinn sem tónleikarnir eru haldir, og hefur dagskráin sjaldan verið glæsilegri.

Þeir sem koma fram eru Luxor, Dísella, Nylon, Bubbi Morthens, Magni & Á móti Sól, Sprengjuhöllin, Guðrún Gunnars og Friðrik Ómar, Garðar Thor Cortes, Land & Synir, Klaufarnir, Stebbi og Eyfi, SSSÓl, Birgitta Haukdal, HARA systur og Ragnheiður Gröndal.

Tónleikarnir voru fyrst haldnir árið 1998. Á undanförnum árum hafa yfir 23 milljónir króna safnast á þessum tónleikum, og nú er markmiðið að sú upphæð hækki um a.m.k. fjórtán milljónir króna.

Allir þeir sem vinna að tónleikunum, listamenn, tæknifólk, og fyrirtæki sem tengjast þeim gefa vinnu sína, auk þess sem Háskólabíó lánar húsnæðið án endurgjalds. Miðaverð rennur því óskipt til Styrktarfélagsins.

Tónleikarnir fara sem fyrr segir fram í Háskólabíói sunnudaginn 30.

desember og hefjast stundvíslega kl. 16:00

Sömu styrktaraðilar hafa unnið að málinu í frá upphafi en það er Bylgjan, Stöð2, EB Hljóðkerfi og Concert.

Afganginn af miðunum má nálgast á Midi.is og á útsölustöðum þeirra en þeir gefa líka alla sína vinnu í kringum tónleikanna og ekkert miðagjald er lagt ofan á söluna. Miðaverð er aðeins 2.500 kr.