Af hverju skírðuð þið Geysi eftir stefnumótasíðu fyrir samkynhneigða?

Ítarlega er fjallað um Ísland í nýjasta þætti Rikets Röst, grínþáttarins norska. ,,Stjórnmálaskýrandi" þáttarins, Pia Haraldsen, var hér á landi í byrjun desember undir því yfirskyni að hún væri að fjalla um land og þjóð vegna nýútkominnar skýrslu Sameinuðu þjóðanna sem setti Ísland í fyrsta sæti yfir þau lönd sem best væri að búa í. Pia stundar það að spyrja framámenn arfaheimskulegra spurninga, og hefur hún lent í því oftar en einu sinni að reiðir viðmælendur hafa hent henni út af skrifstofum sínum.

Á heimasíðu þáttarins má sjá bút úr þættinum þar sem Pia ræðir við Guðlaug Þór Þórðarson heilbrigðisráðherra, og Ársæl Harðarson forstöðumann markaðsmála hjá Ferðamálastofu. Guðlaugur virðist eiga erfitt með að halda andliti meðan Pia kynnir sig á ,,íslensku", sem hún talar með því að skeyta -ur fyrir aftan norsk orð. Ársæll er á hinn bóginn spurður að því af hverju Íslendingar hafi skírt Geysi eftir norskri einkamálasíðu fyrir samkynhneigða.

Meðal þeirra sem urðu fyrir barðinu á Piu í Íslandsferðinni er Halldór J. Kristjánsson, einn bankastjóra Landsbankans, Árni M. Mathiesen, fjármálaráðherra og Dagur B. Eggertsson borgarstjóri. Meðal spurninga sem íslenskir viðmælendur hennar fengu voru hvort til stæði að taka upp skattkerfi á íslandi og hvort við byggðum okkar eigin eldfjöll til að knýja jarðvarmavirkjanir.

Bútinn úr þættinum má nálgast á heimasíðu TV2.