Amy Winehouse vill fremja sjálfsmorð með eiginmanninum

Nýjar vísbendingar í máli Blake Fielder Civil, eiginmanni söngkonunnar og vandræðabarnsins Amy Winehouse benda til þess að hún hafi verið viðriðin málið. Hún gæti átt yfir höfði sér margra ára fangelsisvist verði hún fundin sek.

Í breskum fjölmiðlum er það haft eftir vinum söngkonunnar að hún og eiginmaðurinn hafi gert samning um að drepa sig frekar en að vera aðskilin í mörg ár. Þeir segja að hún geti ekki lifað án Blake, og að fangelsislífið myndi fara með hana.

Amy verður yfirheyrð í vikunni, vegna gruns um að hún hafi átt þátt í máli þegar Blake bauð manni sem hafði kært hann fyrir líkamsárás 200 þúsund pund fyrir að falla frá kærunni.

Þegar fjárhæðin kom fram fóru böndin að berast að Winehouse, enda eiginmaðurinn ekki fjáður og ætti væntanlega í vandræðum með að hósta upp sem samsvarar rúmum 25 milljónum króna.