Sextán þúsund krónur fyrir notaða miða á Led Zeppelin tónleika

Þrátt fyrir að vika sé liðin frá víðfrægum endurkomutónleikum Led Zeppelin eru þeir enn að raka inn peningum. Æstir aðdáendur skallapopparanna eru til í að borga allt að 125 pund fyrir miðabúta og armbönd frá tónleikunum.

,,Ég var einn þeirra heppnu." segir í lýsingu eins seljenda á eBay. ,,Þetta er miðastubbur frá tónleikunum sem tuttugu milljónir manns vildu sjá."

Bresk dagblöð hafa það eftir tónleikagestum að menn hafi boðið um 20 pund fyrir miðastubba og armbönd að tónleikunum loknum. ,,Þetta var furðulegt, en núna skil ég af hverju þeir gerðu þetta." sagði einn gestanna, sem gat þó ekki hugsað sér að selja góssið.

Ásóknin í minjagripina er orðin svo mikil að miðabútur selst nú á jafn mikið og fullgildur miði gerði fyrir tónleikana.