Þegar andlát ber að höndum

Í dag var vefurinn Andlat.is opnaður formlega. Vefurinn er hugsaður sem alhliða vettvangur til þess að aðstoða þegar andlát ber að höndum. Einkunnarorð vefsins er "Við erum hér fyrir þig".

Á Andlat.is eru leiðbeiningar um hvað gera þarf þegar andlát ber að höndum og einnig verður þar hægt að koma á framfæri dánarfregnum, jarðarfarartilkynningum, minningargreinum, minningarorðum og kveðjum.

Hægt verður að minnast látinna ástvina, ættingja eða vina með ýmsu móti eins og með kveðjum, minningargreinum, skrá inn æviágrip eða senda inn stuttar nafnlausar kveðjur "Elsku mamma ég sakna þín svo nú um jólin. Þín dóttir". Þegar kveðja hefur verið send inn kviknar á kerti á síðum andlat.is. og lifir kertið í tvær vikur.

Kveðjur, æviágrip, minningargreinar og minningarorð eru ávallt velkomin á vefinn þó áratugir séu liðnir síðan viðkomandi féll frá. Andlat.is er kjörinn vettvangur til að minnast fæðingardaga, dánardaga eða annarra viðburða í lífi horfinna ástvina.