Ástralskur þingmaður mælir með íslenskum drykkjufélögum

Ástralskur stjórnmálamaður, sem var handjárnaður hálfnakinn við súlu á rússneskum strippklúbb segist hafa lært tvær mikilvægar lexíur af atvikinu.

,,Aldrei leyfa neinum að handjárna þig við súlu, og passaðu þig að vera alltaf í hreinum nærfötum." sagði Nigel Scullion, varaformaður ástralska þjóðarflokksins við Daily Telegraph.

Atvikið átti sér stað árið 1998, þremur árum áður en Scullion, sem er rúmlega fimmtugur, settist á þing. Hann var á ráðstefnu í Sankti Pétursborg þegar hann og maður sem hann lýsti sem brjáluðum sjómanni frá Nýfundnalandi, fóru saman á klúbbinn.

Þingmaðurinn, sem er giftur, sagði að hann hefði skemmt sér konunglega, þrátt fyrir að hafa týnt buxunum sínum. ,,Þetta var frábært kvöld. Í alvöru. Ef þér býðst að fara á fyllerí með íslenskum hvalveiðimönnum eða kanadískum sjóurum áttu endilega að þiggja boðið." bætti Scullion við.

,,Það er leiðinlegt að fólk sjái þetta sem eitthvað neikvætt. Þetta var fyrir tíu árum síðan, og ég var sjóari. Það eiga allir skrautlega fortíð."