Gillz í formannsstól Framsóknar

Bloggarinn Jón Guðmundsson liggur ekki á skoðunum sínum um menn og málefni. Í færslu í síðustu viku lýsir hann yfir aðdáun sinni á Gillzenegger, sem hann segir sjálfumglaðan ljósabekkjafíkil, sem minni sig á Jónas frá Hriflu. Hann segir að Jónas, líkt og Gillzenegger, hafi verið framsóknarmaður sem var aldrei feiminn við að láta í ljós skoðanir sínar.

Jón segir að hann hafi lengi fylgst með bloggsíðu Gillz, enda reyni hann að fylgjast með pólitískri umræðu í netheimum. Hann telur Gillz hafa mikið til brunns að bera, og býst við stórum hlutum af honum. ,,Ég held að hann sé rétti maðurinn til að leiða Framsóknarflokkinn upp úr þeim djúpa dal sem hann er í núna, hvað fylgi varðar. Líkt og Jónas heitinn gerði forðum gæti Gillz leitt Framsóknarflokkinn, sem vel að merkja er eini flokkurinn á Íslandi sem hefur eitthvað vitrænt til málanna að leggja, til glæstra sigra á nýjan leik. " segir Jón á blogginu.

,,Ég tel að Framsóknarflokkurinn þurfi ekki á honum að halda." sagði Guðni Ágústsson formaður flokksins þegar Vísir bar tillöguna undir hann. ,,Það býr framsóknarmaður í mörgum hjörtum, ég er einfær um þetta.

Jón hrífst af hæfni Gillzeneggers í fleiri málum. Hann segir að hann hafi með hárbeittri rökhugsun rýnt í aðstæður til að finna út úr því hvað plagaði femínista, og réttilega komist að því að þær vantaði kynlíf.

,,Ég man nú eftir niðursetningi á einum bænum þar sem ég var í sveit hér áður, sem aldrei hafði stundað kynlíf. Hún lét alltaf eins og yxna nykur, gekk um bölvandi og ragnandi heilu dagana og réðst á allt sem var karlkyns með skömmum og svívirðingum. Mér er því miður ekki kunnugt um hvort hún lagaðist einhvern tíman, en mig grunar að það sem hana vantaði hafi verið gott kynlíf. Það hefur a.m.k. alltaf veitt mér nokkra sálarró að stunda kynlíf, ef ég á að segja eins og er." segir Jón í niðurlagi færslunnar.