Dugguholufólkið, íslensk ævintýramynd frumsýnd á föstudag

Ný íslensk ævintýramynd, Duggholufólkið, eftir Ara Kristinson, sem meðal annars gerði Stikkfrí, verður frumsýnd föstudaginn 7. des í Smárabíói, Háskólabíói, Sambíóunum Álfabakka og Borgarbíói á Akureyri.

Myndin er nútíma ævintýri og fjallar um Kalla, tólf ára borgarbarn sem er alinn upp af einstæðri móður í úthverfi Reykjavíkur. Hann eyðir stærstum hluta tíma síns fyrir framan skjái, í ævintýralöndum netheima, tölvuleikjum eða horfandi á DVD og sjónvarp.

Þegar Kalli er sendur vestur á firði til að dvelja hjá pabba sínum um jólin á afskekktum sveitabæ breytast sýndarævintýri skjáheima í alvöru ævintýri. Hann fær fljótlega nóg af sveitalífinu og ákveður að stinga af. Fljótlega er hann rammvilltur, símasambandslaus í kafaldsbyl og rekst meira að segja á lifandi ísbjörn.

En sýndarheimar eru ekki bara á skjánum, í afskekktri sveitinni eru á reiki dularfullar verur sem er erfitt að festa hönd á - Dugguholufólkið.