Milljarðamæringur á níræðisaldri yngir upp

Joe Hardy III, 84 ára milljarðamæringur frá Pennsylvaníu var harmi slegin þegar eiginkona hans fór frá honum. Hardy og Kristin Georgi, 23ja ára naglasérfræðingur, giftu sig fyrir rúmum þremur mánuðum síðan og sögðu illar tungur að hjónabandið hefði eitthvað með timburvinnsluauðæfi Hardys að gera.Í takti við spár entist hjónabandið ekki lengi - 107 daga, og þá flutti Georgi aftur heim til mömmu. Auðkýfingurinn var niðurbrotinn og hóf strax leit að konu til að eyða restinni af lífinu með, hversu lengi sem það yrði.

Hann virðist ekki hafa grunað að aldursmunurinn hefði haft hönd í bagga með upplausn fyrra hjónabandsins. Unnusta hans þessa dagana er hin 22ja ár Danielle Golden. Hún mun að sögn Daily Mirror vera yfir sig ástfangin af Hardy, sem meðal annars sjarmeraði sína heittelskuðu með því að gefa henni fitusog.

Þrátt fyrir ungan aldur er hin 23ja ára Georgi jafn bitur og hvaða forsmáð eiginkona sem er. ,,Flestir karlmenn fá gráa fiðringinn um fimmtugt. Ekki Joe. Maður hefði haldið að um áttrætt væru menn farnir að róast niður, en nei." sagði Georgi, sem hyggst skrifa bók um stutt hjónaband sitt við milljarðamæringinn.