Leyfir höndunum að hugsa sjálfstætt

Fyrsta myndlistarsýning hér á landi þar sem einungis eru til sýnis svört olíumálverk var opnuð síðasta laugardag í Gallerí Sævar Karl. Myndlistarkonan Laufey Johansen sýndi þar röð verka sem hún málar að hluta eða öllu leiti með berum höndunum. “Ég mála með fingrunum og leyfi þeim einhvern veginn að hugsa dálítið sjálfstætt,” segir Laufey og bætir við að með þeim hætti geti hún tjáð “uppsprettu lífsins, ... eins furðulega og það hljómi nú.” Þetta er fyrsta einkasýning Laufeyjar en á síðasta ári sýndi hún einungis hvít verk á samsýningu listakvenna úr Art 11 hópnum. Svart og hvíttLaufey segir ástæðuna fyrir því að hún fór að mála svartar myndir þá að hún hafi viljað fara í andstöðu við fyrri verk sín og prófa eitthvað nýtt. Hvítt hafi hún valið vegna hreinleikans, en svarti liturinn innihaldi allt litrófið þar sem allir litir blandist saman í einum. “Flestir sem ég þekki bjuggust alls ekki við þessu vegna þess að ég hef áhuga á andlega sviðinu og vegna fyrri verka minna sem voru í fyrstu litrík, en svo alveg hvít.” Næst segist hún vel geta hugsað sér að mála svart og hvítt saman. Laufey stefnir á aðra einkasýningu hér á landi innan árs. Hún segir þó ýmislegt annað spennandi á takteininum sem hún geti ekki sagt frá á þessu stigi; “það verður bara að koma í ljós, en ég get bara sagt að það er ekki hér á landi.” Næstu helgi er vinnustofa Laufeyjar og 10 annarra listakvenna í Art 11 hópnum opin almenningi, og svo allar helgar fram að jólum. Vinnustofan er að Auðbrekku 4 í Kópavogi.