Sprengjuhöllin, Jeff Who? og Motion Boys á NASA

Þrjár af vinsælustu hljómsveitum landsins blása til stórtónleika á NASA þann 16 nóvember næstkomandi.

Í tilkynningu frá sveitunum segir að það séu breyttir tímar í íslenskri popptónlist. ,,Svo virðist sem lítt burðugt sveitaballapopp sé á undanhaldi og ferskari kynslóð sé tekin að úða olíu á nær útbrunninn kyndil íslenskrar popptónlistar." Þessu til sönnunar blási sveitirnar, Sprengjuhöllin, Jeff Who? og Motion Boys til tónleikanna.

Sprengjuhöllina þarf vart að kynna þar sem hún hefur átt tvö af vinsælustu lögum ársins hingað til, „Verum í sambandi" og „Glúm,". En bæði lögin sátu svo vikum skipti í toppsæti Lagalistans. Fyrsta plata sveitarinnar, Tímarnir okkar, hefur svo fengið glimrandi viðtökur bæði hjá gagnrýnendum og plötukaupendum. Fréttablaðið kallaði plötuna m.a. „skemmtilegustu íslensku poppplötuna í áraraðir" og Morgunblaðið gaf plötunni fullt hús með tilheyrandi jáyrðum.

Jeff Who? áttu eitt vinsælasta lag síðasta árs, hið stórskemmtilega og auðraulanlega „Barfly". Nýjasta lag sveitarinnar „She's Got the Touch" hefur heyrst oft upp á síðkastið og er vísbending um hvað önnur plata sveitarinnar kann að bera í skauti sér, en sú er væntanleg með vorinu. Að Airwaves hátíðinni undanskilinni hafa Jeff Who? ekki sést á tónleikum í nokkurn tíma og því verður spennandi að heyra hvað verður á efnisskránni.

Í tilkynningunni segir að Motion Boys séu ,,stimamýksta hljómsveit landsins og þyki bera af í glæsileika." Hljómsveitin átti sumarsmellinn „Hold Me Closer to Your Heart" og nú er „Steal Your Love" tekið að tæta allt og trylla. Þeir slógu rækilega í gegn á Iceland Airwaves hátíðinni fyrir skemmstu, þar sem þeir fylltu gólfið og fengu alla viðstadda til að syngja og dansa með

.

Miðaverð á tónleikana er 1500 krónur og hefst miðasala 1. nóvember á miða.is og í verslunum Skífunnar og BT á landsbyggðinni.