Foxy Brown í einangrun fyrir slagsmál

Rapparinn Foxy Brown situr nú í einangrun í Rikers island fangelsinu í Bandaríkjunum eftir að hafa slegist við annan fanga. Að sögn fangelsisyfirvalda lentu konurnar í slag fyrr í mánuðinum. Í kjölfarið reifst Brown við fangaverði og neitaði að fara í lyfjapróf, með þeim afleiðingum að hún var dæmd í 76 daga einangrun.

Brown, sem er 28 ára, var fyrir skemmstu dæmd til árs fangelsisvistar fyrir að hafa brotið skilorð sem hún hlaut fyrir að ráðast að naglasnyrti á snyrtistofu á Manhattan. Skilorðið braut hún með því að mæta ekki á reiðistjórnunarnámskeið sem henni var gert að sækja.

Þá neitaði hún að mæta fyrir rétt þann 12. október sökuð um að hafa grýtt farsíma sínum í nágranna sem bað hana um að lækka í útvarpinu í bílnum hennar. Hún mætti fjórum dögum síðar og var ákærð fyrir líkamsárás, tilraun til líkamsárásar og fyrir að bera vopn - farsímann. Hún lýsti sig saklausa af öllum ákærunum.