Kryddpíurnar læra súludans

Kryddpíurnar sækja nú stífa tíma í súludansi til að krydda dansatriðin í komandi tónleikaferðalagi sínu. Stúlkurnar læra listina á klúbbnum Soho Revue Bar í London þar sem stripparar og dragdrottningar leika listir sínar við lifandi tónlist öll kvöld.

Tónleikaferðin er þó ekki það eina sem stelpurnar dunda sér við þessa dagana. Breska dagblaðið The Sun segist hafa fyrir því heimildir að norskur húsgagnaframleiðandi hafi fengið píurnar til að hanna nýja línu af húsgögnum fyrir sig. Þess er því sennilega ekki langt að bíða að aðdáendur stúlknanna geti sökkt sér ofan í mjúkan Kryddsófa meðan þeir njóta ljúfra tóna stúlknanna.