Vilja tólf hundruð milljónir fyrir sjómenn og fiskvinnslufólk

Framsóknarflokkurinn vill að ríkisstjórnin verji tólf hundruð milljónum króna í að styrkja sjómenn og fiskvinnslufólk til að setjast á skólabekk. Formaður flokksins sagði á fundi í morgun að uppsagnir síðustu daga í sjávarútveginum séu bara toppurinn á ísjakanum.

Framsóknarflokkurinn hélt nú fyrir hádegið blaðamannafund þar sem þingmenn kynntu annars vegar tillögur flokksins að mótvægisaðgerðum vegna skerðingar þorskkvótans og hins vegar helstu þingmál flokksins sem lögð verða fram í byrjun þings.

Guðni Ágústsson, formaður flokksins, sagði á fundinum í morgun að það hrikti í þegar 15-20 milljarðar væru teknir út úr sjávarútveginum. Því komi uppsagnir síðustu daga ekki á óvart og þær verði fleiri.

Flokkurinn segir mótvægisaðgerðir ríkisstjórnarinnar ómarkvissar og leggur til beinni aðgerðir sem gagnist fólkinu sem verði fyrir skaða vegna skerðingarinnar. Þannig vill Framsókn að 1,2 milljarðar fari í menntun sjómanna og fiskvinnslufólks.

Þá vill flokkurinn að Háskóla Íslands verði falið að stunda hafrannsóknir til að veita Hafrannsóknarstofnun samkeppni. Í það vill flokkurinn verja 400 milljónum króna.