Ríkið fór allt að 87 prósent fram úr fjárhagsáætlunum

Dæmi eru um að framkvæmdir á vegum hins opinbera síðustu ár hafi farið allt að 87 prósent fram úr fjárhagsáætlunum. Ríkisendurskoðun hefur ítrekað gert sömu athugasemdir við ýmsar framkvæmdir á vegum ríkisins.

Oftast eru verkefnin ekki nægileg vel undirbúin áður en hafist er handa. Breytingar eru gerðar eftir að framkvæmdir hefjast. Verk-og kostnaðareftirlit er oft ófullnægjandi og hlutverka- og ábyrgðaskipting þeirra sem að verkinu koma er óskýr.

Skrifstofuhúsnæði Alþingis að Austurstræti - rúm 87 prósent

2001 - Heildarkostnaður við framkvæmdir að Austurstræti 8-10 og Austurstræti 10a varð 249,4 milljónir króna. Áætlaður kostnaður var um 133 milljónir. Verkið fór því rúmlega 87 prósent fram úr áætlun.

Þjóðmenningarhúsið – 33 prósent

2000 - Raunkostnaður við verkefnið nam alls 397,9 m.kr. en fjárveiting til þess var 297,9 milljónir króna.

Þjóðleikhúsið - 15-82 prósent 1990 - Kostnaðaráætlun við endurbætur á Þjóðleikhúsinu árið 1989 nam 269 milljónum króna. Ári seinna nam hún 491,2 milljón. Fjárveiting var 427,2 milljónir og fór verkið því tæp 15 prósent fram úr áætlun, en 82 prósent miðað við upphaflega fjárhagsáætlun. Flugstöð Leifs Eiríkssonar - 41 prósent

1987 - Kostnaður við byggingu Flugstöðvarinnar fór 871 milljón fram úr áætlun sem var 2.121 milljón króna. Framreiknaður kostnaður við fullgerða flugstöð var 2.992 milljónir króna eða 41 prósent hærra en áætlun sagði til um.

Upplýsingarnar eru fengnar frá Ríkisendurskoðun, en þess má geta að fjárhæðirnar eru ekki framreiknaðar til dagsins í dag.

Ýmsar ástæður eru fyrir því að verk fara svo mikið fram úr áætlun. Þar má helst nefna of skamman undirbúningstíma þar sem framkvæmdir hefjast þrátt fyrir að áætlunum sé ekki lokið. Forsendur breytist og verkin taki því gjarnan verulegum breytingum frá fyrstu áætlunum.

Þess má að lokum geta að áætlaður kostnaður við endurbætur á Grímseyjarferjunni var 150 milljónir króna. Gera má ráð fyrir að endanlegur kostnaður við ferjuna verði um 500 milljónir króna.