Íhugar að fara á topp Cho Oyu án súrefnis

Íslenski fjallaleiðsögumaðurinn Leifur Örn Svavarsson íhugar nú að fara án súrefnis á topp Cho Oyu, sjötta hæsta fjalls heims sem er á landamærum Tíbets og Nepals.

Fram kemur í tilkynningu frá Íslenskum fjallaleiðsögumönnum að Leifur sé nú staddur í 5600 metra hæð en þar eru efri grunnbúðir þeirra sem hyggjast ganga á toppinn. Þaðan er jafnframt fjögurra daga ganga á toppinn. Veður hamlar því nú að Leifur geti lagt á tindinn og bíður hann þess að það batni. Ekki er útséð með að Leifur fari súrefnislaus á toppinn, sem er í 8201 metra hæð, en hann þarf að fá samþykki leiðangursstjóra til þess.

Leifur er ekki fyrsti Íslendingurinn sem gengur á fjallið heldur fetar hann í fótspor Everest-faranna Björns, Einars og Hallgríms sem gengu á það árið 1995. Árið 2003 gekk svo Anna Svavarsdóttir fyrst íslenskra kvenna á fjallið.

Hægt er að fylgjast með framgangi leiðangursins og hugleiðingum Leifs á heimasíðu Íslenskra Fjallaleiðsögumanna, www.mountainguide.is/is