Nágrannar Kompáslögmannsins óttast um börnin sín

Íslenskir foreldrar sem búa í nálægð við Kompáslögmanninn á Spáni óttast um börnin sín. Fjallað var um mál lögmannsins í Kompási síðastliðinn miðvikudag. Hann hefur verið ákærður fyrir kynferðisafbrot gegn fjórum unglingsstúlkum, fjórtán og fimmtán ára gömlum.

Kompáslögmaðurinn er búsettur á La Marina rétt við Alicante. Íslenskur fjölskyldufaðir, sem á börn á aldrinum fimm og átta ára, segist óttast nálægðina við manninn. „Börnin okkar eru hér í skóla með barninu hans og okkur stendur ekki á sama," sagði faðirinn. „Mér finnst þetta hálf óhugnalegt. Ég veit ekki alveg hvað maður á að gera í þessu máli," bætir hann við.

Fjölskyldufaðirinn segist ekki hafa ráðfært sig við aðra íslenska foreldra á svæðinu um hvað gera skuli til að vernda börnin. Hann segir þó að mál lögmannsins séu á allra vitorði „Þetta er lítið samfélag og hér þekkja allir alla," segir maðurinn. Faðirinn telur að Spánverjar viti ekki um sögu Kompáslögmannsins. Hann telur að mál af því tagi sem maðurinn hefur verið ákærður fyrir séu litin mjög alvarlegum augum af spænskum yfirvöldum.