Fangi sýknaður af ákæru um smygl

Héraðsdómur Suðurlands sýknaði í dag fanga á Litla Hrauni af ákæru vegna brota á tolla- og lyfsölulögum. Í dómnum er vitnað í skýrslu fangavarða frá 24. nóvember 2006. Þar kemur fram að klefaleit hafi verið gerð hjá ákærða þann sama dag. „Hafi ákærða verið boðið að vera viðstaddur leitina, sem hann þáði. Þá hafi fundist ein sprauta, tvær nálar, níutíu og átta bleikar litlar töflur í plastpoka og tvær ambúlur með svörtum miða sem á stóð „supertest og trenbolone acetate".

Hafi þessir hlutir verið vafðir inn í klósettpappír og faldir inni í hátalaraboxi við hliðina á sjónvarpi. Eitt spjald með átta brúnum töflum sem á stóð „neo citramonas" hafi verið á hillu hægra megin þegar gengið var inn í klefann. Eitt stykki vasahnífur, 11 cm langur með grænu skafti, hafi verið í vasa á rauðum jakka sem var hengdur upp í fataskáp. Þá kemur fram í athugasemdum í skýrslunni að fanginn segist ekki eiga það sem fannst í hátalaraboxinu og kannaðist ekki við það en brúnu töflurnar væru verkjalyf sem hann hefði fengið send heiman frá sér."

Fanginn neitaði því einnig fyrir dómi að hann ætti efnin og bar að hann hefði fengið hátalarann frá samfanga. Dómurinn taldi að ákæruvaldinu hefði ekki tekist að sanna, svo hafið væri yfir allan vafa, að umrædd efni hefðu tilheyrt ákærða eða hann hafi mátt vita um þau. Því væri ekki lögfull sönnun fram komin um sekt hans.