Athafnamaðurinn Pálmi Haraldsson ætlar ekki að kaupa enska úrvalsdeildarliðið Newcastle. Þetta staðfesti hann í samtali við blaðamann Vísis í morgun. Þar með er ljóst að hvorki hann né Jón Ásgeir Jóhannesson, sem báðir voru tengdir við möguleg kaup á félaginu um helgina, munu kaupa það.

Heimildir Vísis herma að samningaviðræður hafi verið komnar af stað en snuðra hafi hlaupið á þráðinn þegar fréttir fóru að berast af mögulegum kaupum þeirra félaga á Newcastle. Víst er að viðræður fóru af stað en í gærkvöld var ljóst að af kaupunum yrði ekki.