Unglingar staðnir að veggjakroti

Tveir piltar voru staðnir að veggjakroti í Smáralind í gærkvöld. Piltarnir, sem eru 13 og 14 ára, og foreldrar þeirra fengu tiltal frá lögreglunni. Lögreglan lítur veggjakrot alvarlegum augum enda er um eignaspjöll að ræða. Mál sem þessi koma nánast daglega á borð lögreglu. Í fyrrakvöld voru þrír piltar, sem einnig eru 13 og 14 ára, teknir fyrir sömu iðju í Breiðholti. Þremenningarnir voru nokkuð stórtækir og ljóst er að töluverð vinna fer í að ná veggjakroti þeirra af.

Fleiri unglingar komu við sögu hjá lögreglunni á höfuðborgarsvæðinu í gær. Tveir strákar um fermingaraldur voru staðnir að hnupli í matvöruverslun í austurborginni laust eftir hádegi og síðdegis var jafnaldri þeirra gripinn í Kópavogi. Sá reyndi að stela peningum úr búningsklefa. Á miðvikudag voru tvær stúlkur, 12 og 13 ára, teknar í Smáralind. Þær höfðu hnuplað varningi úr fjórum verslunum.