Vandi sjávarbyggða til umræðu á Alþingi

Vandi sjávarbyggðanna var til umræðu utan dagskrár á Alþingi í dag. Málshefjandi var Ingibjörg Inga Guðmundsdóttir, varaþingmaður Vinstri grænna norðvesturkjördæmi. Einar K. Guðfinnsson var til andsvara. Í kjölfarið fylgdu svo aðrir þingmenn til að ræða þetta mál sem mikið hefur verið í umræðunni.

Ingibjörg Inga Guðmundsdóttir sagði að sjávarbyggðirnar hangi á bláþræði. Hún tók dæmi af fyrirtækjum víðsvegar um landið sem nýverið hafa lagt upp laupana og hún sagðist hafa fundið fyrir kvíða og óvissu í loftinu þegar hún heimsótti sjávarþorp á Vestfjörðum um síðustu helgi. Hún sagði að verst hefði íbúum þorpanna þótt tómlæti ríkisstjórnarinnar sem hún sagði þá finna fyrir.

Einar K. Guðfinnsson, sjávarútvegsráðherra, var til andsvara og hann tók undir með Ingibjörgu að vissulega væri vandinn víða mikill og að hluta þess vanda mætti rekja til fiskveiðistjórnunarkerfisins. Hann benti á að undanfarin ár hafi verið reynt að byggja inn í kerfið byggðatengda þætti sem hann sagði hafa skilað sér til margra byggðalaga. Einar sagði einnig mikilvægt að úthluta byggðakvóta á markvissari hátt en áður hafi verið gert. Hann sagði brýnt að reyna að tryggja að slíkur kvóti færi til þeirra byggðalaga sem í mestum vanda væru.

Birkir Jón Jónsson, þingmaður Framsóknarflokksins, benti á að í sáttmála síðustu ríkisstjórnar hafi verið gert ráð fyrir að hluti veiðigjalds ætti að renna aftur til sjávarbyggðanna í formi atvinnuuppbygginar og nýsköpunar. Ekkert slíkt ákvæði væri hins vegar í stjórnarsáttmála nýrrar ríkisstjórnar. Össur Skarphéðinsson, iðnaðarráðherra, sagði hárrétt að aðgerða væri þörf og að ný ríkisstjórn hefði þegar tryggt flutning 20 opinberra starfa til Vestfjarða.

Steingrímur J. Sigfússon, formaður Vinstri grænna, sagði hins vegar að þau störf væru aðeins dropi í hafið, því á síðustu árum hefðu tapast hátt í 300 störf á svæðinu. Stórtækari aðgera væri því þörf. Hann sagði að fólkið í sjávarbyggðunum gæti ekki beðið í óvissu fram á haust og hann sagði hætt við enn meiri fólksflótta af svæðunum verði ekkert að gert.