Ríkisstjórnin stefnir á vit nýrra tíma á traustum grunni

Geir H. Haarde flutti í kvöld stefnuræðu sína á Alþingi. Hann fór yfir stjórnarsáttmála nýrrar ríkisstjórnar og greindi frá helstu áherslumálum næstu ára. Ríkisstjórnarflokkarnir hafi einsett sér að mynda frjálslynda umbótastjórn um kraftmikið efnahagslíf, öfluga velferðarþjónustu, bættan hag heimilanna og aukna samkeppnishæfni atvinnulífsins. „Með þessi meginmarkmið að leiðarljósi stefnir hin nýja ríkisstjórn á vit nýrra tíma á þeim trausta grunni sem lagður hefur verið á undanförnum árum," sagði hann.

Geir byrjaði á því að þakka öllum þingmönnum fyrir drengilega og málefnalega kosningabaráttu. Hann benti á að sjaldan hefðu jafnmargir nýjir þingmenn tekið til starfa sem hann sagði til marks um að Alþingi væri eftirsóknarverður vinnustaður.

Þá fór forsætisráðherra yfir úrslit þingkosninganna. Hann sagði að úrslitin bæru það með sér að ríkisstjórn Sjálfstæðisflokks og Samfylkingar hefði verið öflugasti kosturinn í stöðunni um leið og hann þakkaði Framsóknarflokknum fyrir ánægjulegt samstarf.

Í ræðu sinni sagði Geir að hin nýja ríkisstjórn byggi á samstarfi tveggja stærstu flokka landsins. „Þessir flokkar hafa einsett sér að mynda frjálslynda umbótastjórn um kraftmikið efnahagslíf, öfluga velferðarþjónustu, bættan hag heimilanna og aukna samkeppnishæfni atvinnulífsins. Með þessi meginmarkmið að leiðarljósi stefnir hin nýja ríkisstjórn á vit nýrra tíma á þeim trausta grunni sem lagður hefur verið á undanförnum árum," sagði Geir.

Hann sagði ennfremur að lögð yrði áhersla á að raunverulegt jafnrétti verði leiðarljós í allri stefnumótun ríkisstjórnarinnar „sem skapi öllum landsmönnum jöfn tækifæri. Árangur og hagsæld undanfarinna ára gefur tækifæri til enn frekari framfara og Ísland á að sjálfsögðu að vera áfram í fararbroddi þeirra þjóða sem búa við best lífskjör. Málefni yngstu og elstu kynslóðanna fá forgang og ríkisstjórnin mun leggja áherslu á að bæta kjör þeirra hópa sem standa höllustum fæti. Hún mun vinna að víðtækri sátt í samfélaginu um aðgerðir á sviði efnahags og félagsmála, um náttúruvernd og auðlindanýtingu og stöðu Íslands í samfélagi þjóðanna."

Ræðu Geirs má lesa í heild sinni hér.