Felldi úr gildi dóm um afhendingu barns

Hæstiréttur felldi í dag úr gildi dóm héraðsdóms um að íslenskri konu bæri að afhenda barnsföður sínum dóttur sína með beinni aðfararaðgerð þar sem dómur á æðra dómstigi í Frakklandi væri ekki fallinn.

Maðurinn, sem er franskur, krafðist þess fyrir dómi hér á landi að fá dóttur sína afhenta með beinni aðfarargerð en hún var ásamt móður sinni á Íslandi. Byggði hann það á því barnsmóðir hans hefði flutt stúlkuna hingað til lands með ólögmætum hætti eftir að héraðsdómstóll í París hafði dæmt að þau skyldu fara með sameiginlega forsjá yfir barninu.

Þeim dómi hafði konan áfrýjað til æðra dómstigs í Frakklandi og á þeim grundvelli að dómur væri ekki fallinn þar felldi Hæstiréttur úr gildi þá ákvörðun héraðsdóms að manninum væri heimilt að fá stúlkuna afhenta með beinni aðfarargerð innan þriggja vikna.