Lisa Ekdahl hefði verið sókndjarfari gegn Tyson

Íslenska karlalandsliðið í knattspyrnu fær háðuglega útreið í sænskum fjölmiðlum eftir viðureignina í Stokkhólmi í gær, bæði hjá sænsku leikmönnunum og blaðamönnum.

Simon Bank, pistlahöfundur hjá Aftonbladet, segist hafa séð Svía mæta Lichtenstein, Möltu, San Marínó og Moldavíu en aldrei séð eins skelfingu lostið lið og það íslenska í gær.

Aðeins þrír leikmenn íslenska liðsins hafi farið fram þegar liðið hafi fengið aukaspyrnur á álitlegum stöðum og segir Bank að söngkonan Lisa Ekdahl hefði verið í sókndjafari í hnefaleikahringnum gegn Mike Tyson en íslenska liðið var í leiknum í gær.

Bank hefur eftir hinum rólega Lars Lagerbäck eftir leikinn að hann hafi verið góður. Þetta sé sambærilegt því að aðrir hlaupi upp á Globen-höllina og hrópi: „Komið þið með leðurbuxurnar (lederhosen) því hérna er ég."

Þá hefur Svenska dagbladet eftir Lars Lageråck að leikurinn í gær hafi verið eins og gönguferð í Parken (promenad i Parken) og sigurinn ótrúlega sætur. Þar kemur enn fremur fram að íslenska vörnin hafi verið eins og höfuðlaus her sem meðal annars hafi gefið Marcusi Allbäck, framherja Svía, eitt mark. Þar taldi Ívar Ingimarsson að dæmt hefði verið á sig inni í teig íslenska liðsins en Svíar nýttu sér misskilninginn og skoruðu fimmta markið í leiknum. Marcus Allbäck segist í samtali við Svenska dagbladet ekki vita hvað Ívar hafi verið að spá en þetta hafi verið undarlegt mark.

Sænskir miðlar benda annars á að það þurfi mikið að bregða út af svo sænska liðið tryggi sér ekki farseðilinn á Evrópumótið í knattspyrnu í Austurríki og Sviss sem hefst eftir nákvæmlega ár. Liðið sé efst í F-riðli, eigi fimm leiki eftir og þar af þrjá heima.