Mel B. nefnir dóttur sína eftir Eddie Murphy

Kryddpían Mel B., sem eignaðist sína aðra dóttur þann 3. apríl síðastliðinn, er búin að gefa henni nafn. Hefur stúlkan fengið nafnið Angel Iris Murphy Brown, en hún fær Murphy nafnið eftir grínleikarandum Eddie Murphy, sem Mel B. segir vera föður dóttur sinnar. Murphy hefur neitað að ganga við barninu fyrr en faðernispróf hefur verið framkvæmt.

Nafn stúlkunnar er ekki út í loftið en Mel B. segir Angel nafnið hafa verið valið vegna þess að barnið hafi verið sem engill á meðgöngunni, Iris sé nafn ömmu hennar, Murphy sé nafn föður stúlkunnar og Brown eftirnafn hennar sjálfrar. Eldri dóttir Mel B. ber nafnið Phoenix Chi, en hana eignaðist söngkonan með fyrrum eiginmanni sínum, dansaranum Jimmy Gulzar.