Hitti valdamesta Vítisengil Danmerkur

„Ég vissi nú ekki að hann væri nýsloppinn úr 16 ára fangelsi fyrir manndráp, en þetta virkaði sem fínn náungi," segir Margrét Helgadóttir bifhjólakona sem endaði í partýi með Jörn „Jönke" Nielsen þegar hann var hér á landi árið 1999.

Margrét hefur ekkert hitt né heyrt af Jönke síðan hann var hér á landi og segist sjálf bara vera saklaus húsmóðir í Breiðholti. Hún er meðlimur í Sniglunum en þekkir nokkra Fáfnismenn mjög vel. „Á þessum tíma var nú ekki jafnmikil umræða um Hells Angels og er í dag," segir Margrét en Jönke er talinn einn valdamesti Vítisengill Danmerkur.

Hann gekk í Vítisenglana árið 1980 og tók virkan þátt í stríði sem geisaði á milli Hells´Angels og Bullshitt mótorhljólaklíkunnar. Hann myrti síðan foringja klíkunnar sem kallaður var Makríllinn. Skaut hann 25 skotum úr vélbyssu og var í kjölfarið dæmdur í 16 ára fangelsi.

Jönke var hinsvegar hér á landi árið 1999 og eyddi helgi með Margréti og félögum. Þetta sumar sótti Margrét um í lögreglunni. „Ég ætlaði að láta gamlan draum rætast." Það gekk þó ekki eftir og skrifaði Margrét á bloggsíðu sína að kannski gæti rassía sem lögreglan gerði í húsnæði Fáfnismanna haft þar áhrif.

Þar gerði lögreglan upptækar myndir í eigu Fáfnismanna og á nokkrum þeirra var Margrét í fanginu á Jönke. „Nei þetta var nú meira skrifað í gríni, ég hugsa að þetta hafi ekki haft nein áhrif á umsókn mína í lögregluna," segir Margrét og hlær.

Margrét setti barnaland.is á aðra hliðina eftir að hún bloggaði um þessi kynni sín af Vítisenglinum. „Ég vissi nú að ég fengi einhver viðbrögð en þetta var ótrúlegt. Einn morguninn fékk ég 700 heimsóknir og það var bara eins og hann væri maðurinn minn. Þetta var sjúklega fyndið," segir Margrét sem segist þó ekki hafa áhuga á Jönke sem mannsefni. „Hann er nú ekki beint mín týpa. Ég myndi frekar kjósa minna vesen og getað farið út í búð án þess að vera með lögregluna á hælunum."

Margrét segist þekkja marga Fáfnismenn sem hafi verið góðir vinir hennar í yfir tíu ár. „Þeir eru margir mjög góðir vinir mínir þó ég sé ekkert alltaf sátt við allt sem þeir gera. En ég er fullorðin og verð að fá að velja mína vini."

Henni finnst umræðan um Fáfni hafa gengið of langt upp á síðkastið. Ekki síst þegar lögreglan vaktaði partý í klúbbhúsi félagsins fyrir skömmu. „Það lá við að það væru þyrlur þarna á sveimi. Ég hringdi nú bara í félaga mína og sagði að ég kæmi kannski í næsta partý. Ekki vildi ég lenda í einhverri rassaskoðun," segir Margrét og hlær.

Hún segist þó vel gera sér grein fyrir því að Hells´Angels menn séu engir kórdrengir. „Þeir fara ekkert í kirkju á sunnudögum og eru ekkert að hjálpa gömlum konum yfir götur. Hjólamenningin hér er lítil og við þekkjumst öll vel. Ég hef ekkert persónulega mikinn áhuga á fá þessa menn hingað til lands. En maður bannar ekki fullorðnum frekar en börnum að leika við hinn eða þennan."