Denzel Washington gefur pening til að efla ræðulið

Hollywood stórstjarnan Denzel Washington ætlar að gefa Wiley háskólanum í Texas eina milljón Bandaríkjadala, eða um 60 milljónir króna, svo ræðulið skólans geti tekið til starfa á nýjan leik. Wiley er aðal sögusvið nýjustu myndar hans, sem ber titilinn The Great Debaters. Skólastjórnendur í Wiley tilkynntu um gjöfina í gær.

The Great Debaters er saga af ræðuliði Wiley skólans árið 1930. Washington leikur kennarann og ljóðskáldið Melvon Tolson, sem þjálfaði liðið, en það var einungis skipað blökkumönnum.

The Great Debaters verður frumsýnd vestanhafs á jóladag. Myndin hefur verið tilnefnd til Golden Globe verðlauna í flokki dramakvikmynda.