Kristileg samtök biðja fyrir Britney Spears

Britney Spears hefur borist hjálp úr óvæntri átt. Kristilegu samtökin Hollywood Prayer Network biðja nú fyrir söngkonunni eins og þau eigi lífið að leysa.

Hollywood Prayer Network eru samtök fimmþúsund kristinna manna sem biðja fyrir föllnum Hollywoodstjörnum í stað þess að afskrifa þær sem óforbetranlega vandræðagemsa.

Samtökin sjá Hollywood sem stærsta trúboðssvæði sem eftir er, valdamikinn iðnað sem getur breitt út fangaðarerindið á öflugan hátt. Þau hafa gefið Paris Hilton biblíu, og hyggjast gefa Britney eina slíka innan skamms. Þá hafa þau stutt dyggilega við unga leikara sem eru að reyna að hasla sér völl í bransanum.

Hópurinn er með söfnuði í sextán borgum í Bandaríkjunum og átta löndum. Robert Johnston, prófessor í guðfræði við háskólann í Pasadena segir að hann sé hluti af stærri kristnum samtökum sem sjá Hollywood sem besta tækið til þess að afla trúnni fleiri fylgjenda. ,,Stórstjarna sem bætir líf sitt og þakkar guði árangurinn gæti haft gríðarleg áhrif á yngri kynslóðina." segir Johnston.

Hundruðir hafa skráð sig á óformlegan lista samtakanna sem leyfir þeim að biðja fyrir stjörnu að eigin vali, eða láta úthluta sér einni. Spears er sú stjarna sem vinsælast er að biðja fyrir þessa dagana. Þær þurfa þó ekkert að vera á barmi taugaáfalls til að þiggja smá trúarlega umhyggju. Einnig er boðið upp á að biðja fyrir uppáhalds leikaranum sínum, stjörnu sem virðist einmana eða leið, eða leikara sem hefur leikið í mörgum misheppnuðum myndum í röð.